រសៀលថ្ងៃទី១៦  ខែមីនា  ឆ្នាំ២០២៣  ក្រុមការងារមន្ទីរកសិកម្ម  រុក្ខាប្រមាញ់  និងនេសាទ  ខេត្តរតនគិរី  ដឹកនាំដោយលោកស្រី  ម៉ោង  ពុទ្ធាលក្ខិណា  អនុប្រធានមន្ទីរ  បានចូលរួមអមដំណេីរឯកឧត្ដម ហ៊ាន  វណ្ណហន  រដ្ឋលេខាធិការ ក្រសួងកសិកម្ម  រុក្ខាប្រមាញ់ និងនេសាទ  ចុះពិនិត្យពីខ្សែច្រវ៉ាក់ផលិតកម្មចន្ទី  របស់បងប្អូនជនជាតិដេីមភាគតិច គ្រឹង  នៅភូមិធួយទុំ  ឃុំចាអ៊ុង  ស្រុកអូរជុំ  ខេត្តរតនគិរី។ 

  ឯកឧត្ដមបានជួបសំណេះសំណាលជាមួយប្រធាន និងសមាជិកសហគមន៍កសិកម្មចម្រុះធួយទុំរតនៈ  ដោយសាកសួរពីបរិមាណផលស្វាយចន្ទីនិងបញ្ហាជួបប្រទះកន្លងមករបស់កសិករផលិតស្វាយចន្ទី។ 

បន្ទាប់មក ឯកឧត្ដមបានចុះពិនិត្យសកម្មភាពទិញស្វាយចន្ទីរបស់សហគមន៍កសិកម្មចម្រុះធួយទុំរតនៈ  ដែលបានចុះកិច្ចព្រមព្រៀងទិញលក់ជាមួុយលោក ទីវ  កុកលាង តំណាងក្រុមហ៊ុនអូរលែម ដោយក្រុមហ៊ុនតម្រូវឲ្យសហគមន៍ពិនិត្យជ្រើសរើសយកគ្រាប់ស្វាយចន្ទីដែលល្អ ដោយមិនទទួលទិញគ្រាប់ចន្ធីស្អុយ ខ្ចី ស្ងួតល្មានលាយដុំថ្ម សាច់ ជាដើម ពិសេសគ្រាប់ស្វាយចន្ទីណាដែលប្រើប្រាស់សារធាតុគិមីនោះទេ ដោយសហគមន៍ទទួលបានផលចំណេញ ២០៛/១គីឡូ។ 

សហគមន៍កសិកម្មធួយទុំរតនៈមានសមាជិកផលិតចន្ទីចំនួន៥៩នាក់  លេីផ្ទៃដី ១៤៣.៥ហ.ត  អាចផ្គត់ផ្គង់បាន ១១៤  ៨០០គីឡូ  ក្នុង០១ឆ្នាំ។  បច្ចុប្បន្នសហគមន៍ទិញចន្ទីពីសមាជិកក្នុង ០១គីឡូតម្លៃ ៤២៥០៛  អាចទិញបានក្នុង០១ថ្ងៃចំនួន ១៥០០គីឡូ  ទៅ៣០០០គីឡូ។ សហគមន៍កសិកម្មធួយទុំរតនៈ  ត្រូវបានជាប់ក្នុងគម្រោងពិពិធកម្មកសិកម្ម (CASDP) ដោយបានរៀបចំសំណេីពិពិធកម្ម  និងផែនការអាជីវកម្មស្វាយចន្ទីក្នុងចំនួនទឹកប្រាក់ជាង ១១ ម៉ឺនដុល្លារ។

បន្ទាប់មកទៀត ឯកឧត្ដម និងក្រុមការងារក៏បានជួបជជែកជាឈ្មួញកណ្តាល  នៅជិតបឹងកំសាន្ត  ក្នុងក្រុងបាលុង ដោយទិញចន្ទីធម្មតាតម្លៃ ៤១០០/១គីឡូ  ហើយក្នុង ០១ថ្ងៃ ឈ្មួញគាត់អាចប្រមូលទិញគ្រាប់ស្វាយចន្ទីរបាន ៨តោន ទៅ ១០តោន។